Guðmundur B. Ingvarsson

Vegna ferðalags í næstu viku þá kemur 80's lag vikunnar snemma í þetta sinn.

 
The Romantics var stofnuð í  Detroit, Bandaríkjunum, á Valentínusardaginn árið 1977 af þeim Wally Palmar (söngur, gítar), Mike Skill (gítar), Rich Cole (bassi) og Jimmy Marinos (trommur, söngur).  Fyrsta breiðskífa sveitarinnar leit dagsins ljós árið 1980 og nefndist einfaldlega The Romantics.  Af vinsælum lögum af plötunni má nefna What I Like About You, When I Look In Your Eyes og She's Got Everything.  Á þeim tíma var hljómsveitin býsna vinnusöm því önnur breiðskífa hennar, National Breakout, kom út árið 1981 og sú þriðja, Strictly Personal, árið eftir.  Hvorug þeirra náði miklum vinsældum.  Þess ber að geta að áður en að útgáfu Strictly Personal kom hafði gítarleikarinn Mike Skill yfirgefið bandið og í hans stað komið Coz Canler.  Eftir útgáfu Strictly Personal snéri Mike Skill hins vegar aftur og þá sem bassaleikari því Rich Cole hafði sagt skilið við sveitina. 

Það var ekki fyrr en við útgáfu fjórðu breiðskífu sveitarinnar árið 1983 að hún sló í gegn.  In Heat varð söluhæsta plata The Romantics en hún inniheldur meðal annars lögin Talking in Your Sleep og One in a Million sem urðu geysivinsæl.  Hér fyrir neðan má einmitt finna tengil á myndbandið við fyrrnefnda lagið.

Fimmta breiðskífa The Romantics leit dagsins ljós árið 1985 og bar hún nafnið Rhythm Romance.  Sveitin átti svo í áralöngum málaferlum við útgefanda sinn og sendi því ekki frá sér breiðskífu í hart nær tvo áratugi.  Það var ekki fyrr en árið 2003 að platan 61/49 kom út en fimm laga smáskífa, Made in Detroit, hafði komið út í millitíðinni (1993).  Auk þess höfðu orðið tíð trommaraskipti á þessu tímabili en núverandi trymbill sveitarinnar er Brad Elvis.

Talking in Your Sleep með The Romantics er 80's lag vikunnar að þessu sinni. 

Heimildir: www.wikipedia.org, www.allmusic.com

 

The Romantics - Talking in Your Sleep (1983) 

Jæja, nú er farið að vora fyrir alvöru hér í S-Frakklandi.  Þótt síðustu vikur hafi verið nokkuð vinda- og á stundum vætusamar hefur hitastigið farið smám saman hækkandi og nú síðustu daga hafa verið um og yfir 20°C.  Í gær var veðrið sérstaklega gott - glampandi sól, stillt og hitinn fór í 24°C.  Eins og gefur að skilja var margt um manninn í miðbæ hinnar bleiku borgar (Toulouse - la ville en rose) og flestir voru greinilega búnir að dusta rykið af sumarklæðum sínum.  Veðrið er svo litlu síðra í dag svo mér, næpuhvítum Íslendingnum, er því ekki til setunnar boðið; ég er farinn út að sleikja sólina...

Go West var stofnuð árið 1982 af þeim Peter Cox (söngur) og Richard Drummie (gítar).  Fyrsta hljómplata sveitarinnar kom út árið 1985 og bar nafn hennar; Go West.  Á plötunni má finna hið þekkta lag We Close Our Eyes en einnig lögin Don't Look Down, Call Me, og Eye to Eye sem urðu nokkuð vinsæl.  Árið 1987 kom út platan Dancin' on the Couch og árið 1992 platan Indian Summer.  Hvorug þeirra náði miklum vinsældum, jafnvel þó að á þeirri síðarnefndu megi finna lagið Faithful, sem varð nokkuð vinsælt, og svo hið geysivinsæla lag King of Wishful Thinking.  Upprunalega kom King of Wishful Thinking út árið 1990 og þá í kvikmyndinni Pretty Woman.  Svo fór að lagið varð eitt það mest spilaða í Bandaríkjunum það ár.  Hér fyrir neðan er tengill á myndbandið við lagið.

Þótt engin hljómplata hafi komið frá Go West síðustu 16 árin hefur sveitin starfað og verið nokkuð virk við hljómleikahald.

Heimildir: www.wikipedia.org, www.allmusic.com

 

Go West - King of Wishful Thinking (1990) 

Þetta eru áhugaverðar breytingar sem orðið hafa á Múlakvísl og fróðlegt að sjá hana svona vatnslitla og tæra því venjulega er hún grá af aurburði.  Það verður sannarlega spennandi að fylgjast með framvindunni á Mýrdalssandi.

Þótt því fari fjarri að ég sé jafn tengdur Múlakvísl og Reynir Ragnarsson, fyrrverandi lögreglumaður í Vík, þá mun áin alltaf verða mér hugleiknari en mörg önnur vatnsföll eftir að ég fór að henni, sem sérfræðingur Raunvísindastofnunar Háskólans, ásamt Vatnamælingamönnum er hún hljóp þann 7. júlí 2005.  Það var sama dag og sprengjutilræðin voru gerð í neðanjarðarlestunum í London.  Ég tók vatnssýni úr ánni sem var býsna vatnsmikil, dökkgrá af aurburði og angaði af brennisteinsvetni (hveralykt).  Vatnamælingamenn skutluðu mér með sýnið heim til Reynis Ragnarssonar og frúr þar sem ég síaði sýnið í þvottahúsinu hjá þeim hjónum.  Á meðan ég síaði þá rennslismældu þeir Vatnamælingamenn ána.  Síunin gekk afar hægt fyrir sig því síurnar stífluðust fljótt af öllum aurnum og þurfti ég því að skipta um síu í síuhaldaranum þrisvar eða fjórum sinnum.  Svo fór að það tók mig rúmlega tvo tíma að sía 5 lítra sýni en það tekur venjulega innan við hálftíma ef ekki er mikill aur í sýninu.  Ég man sérstaklega eftir því hversu mikil fýla var af árvatninu, einhverskonar blanda af brennisteinsvetni og járni.  Það er erfitt að lýsa þessari lykt en útbúnaðurinn, sem ég notaði í ferðinni, og hendurnar á mér lyktuðu í einn til tvo daga á eftir.  Já, svona hófust nú kynni mín af Múlakvísl.

	Veður yfir á stígvélum
Ábyrgðarmaður færslu Tilkynna um óviðeigandi tengingu við frétt

General Public var stofnuð af þeim Dave Wakeling (söngur, gítar) og Ranking Roger (söngur) árið 1983 en þeir félagar höfðu fram að því verið meðlimir sveitarinnar The English Beat.  Wakeling var helsti lagasmiður sveitarinnar og spilaði hún að mestu nýrómantískt léttpopp, á stundum undir ska-áhrifum.

General Public sendi frá sér tvær breiðskífur - All the Rage (1984) og Hand to Mouth (1986) - áður en hún hætti störfum árið 1987.  Þekktasta lag sveitarinnar, Tenderness, prýddi fyrri skífuna, ásamt lögum eins og Never You Done That, As a Matter of Fact og General Public.  Vinsælustu lögin á síðari skífunni voru Come Again! og Too Much or Nothing.  Árið 1994 kom sveitin saman á ný og gerði plötu sem kom út árið 1995 og bar titilinn Rub It Better.  Sú plata náði litlum vinsældum og úr varð að sveitin lagði endanlega upp laupana skömmu síðar. 

Heimild: www.allmusic.com

 

General Public - Tenderness (1984)